足彩推荐：艾云费格逊弹起 爱尔兰抢半W拉唔住

来到国际赛期，今日有场热身赛值得留意，就系爱尔兰主场迎战拉脱维亚。爱尔兰有新星艾云费格逊冒起，被视为复兴希望，不过嚟紧欧国外要硬撼法国，今仗对拉脱维亚试阵为主，随时快刀斩乱麻，半场主胜有计。（周四凌晨3时45分开赛）

爱尔兰大军名单都系以英超、英冠球队成员为主，比较特别系曾代表苏格兰青年军出战嘅米克庄士东，及时转籍可为「绿军」披甲，佢系阵中少有并非喺英伦三岛搵食嘅球员，不过外借去葡超嘅甘马雷斯表现一般。

爱尔兰除咗继续倚重经验丰富嘅史密斯高文、占士麦坚恩、轩迪克外，亦锐意多用新人，最瞩目梗系艾云费格逊，呢位年仅18岁嘅白礼顿前锋，虽然之前两次为爱尔兰上阵未有进帐，但佢喺今季英超已入3粒，要知道爱尔兰传统上一向守强攻弱，自从罗比坚尼退役後，前线缺少一把锐利尖刀，艾云费格逊如果可弹起，绝对系「绿军」福音。

另一边厢，拉脱维亚以效力国内联赛球员为班底，锋线只有喺意甲史柏斯亚搵食嘅高尔利斯较有分量，佢哋自从2004年杀入欧国盃决赛周後，未尝再战大赛滋味，上年喺欧国联D1组获首名，只因对手系摩尔多瓦、安道尔及列支敦士登之流，不宜高估。

以波论波，爱尔兰明显胜一筹，要赢拉脱维亚冇难度，不过要考虑到佢哋喺下周欧国外要硬撼劲旅法国，就算备战试阵亦会点到即止，加上近5次对住拉脱维亚，「绿军」赢晒之余，有4次上半场取得领先优势，不妨捧半场主胜。